上海個天氣四季分明。3月、4月、5月春天，6月、7月、8月熱天，9月、10月、11月秋天，12月、1月、2月冷天。每個季節3個月，大家勿吃虧。現在勿一樣了，熱天與冷天大出來了，春天與秋天縮脫了。嘸沒太長個辰光可以來穿春裝跟秋裝了。買衣裳個重頭戲變成了去買夏裝和冬裝。歡喜打扮、歡喜翻翻行頭個小姑娘告老阿姨對搿樣個體會肯定更加深刻個。
天冷了，老早個上海人貼身穿絨布衫、絨布褲。后來更加方便與暖熱個是套棉毛衫跟棉毛褲了。上海人把厚一點個針織棉紡內衣叫做棉毛衫。三槍牌是棉毛衫褲個上海名牌。伊出名辣當時放日本電視劇《姿三四郎》個辰光。“乓乓乓，三槍牌內衣！”搿也是電視里做廣告個先行者。棉毛衫外面要穿襯衫。既要體面又要節約個上海人就行出了節約領。節約領為了省點衣料，只有一只登樣個襯衫領頭，像一件半截子個小馬甲套辣肩胛上，告咾上海人還叫伊為假領頭。假領頭只要面子、勿要夾里，當時穿了假領頭還是要撥大家叉叉個。襯衫外面穿絨線衫了。絨線衫就是北方人講個羊毛衣了。上海個女同志都會自家來打毛衣——結絨線。一點勿會結絨線個阿姨媽媽辣伊個年代會撥人家背后講兩句：“我看伊勿是笨而是懶！連結件絨線衫、絨線背心都勿會，伊拉先生嘸沒福氣……”怕冷個上海人有辰光還會套兩件、三件絨線衫。加上下身還穿絨線褲、絨線襪，可以講一個人身浪背了半爿絨線店了。真正個冷天里，上海人還會穿上棉襖、披上大衣。舊了一點棉襖，辣上海閑話里叫老棉襖。有點家當個人家用絲棉來做棉襖，衣裳個面布也用綢子來做，來顯示自家個身價。農歷新年，是弄堂里小囡穿新棉襖個最佳辰光。假使能夠從里面新到外面，從頭頂新到腳底，那就是有銅鈿人家個寶寶子、肉肉子哉。
從棉毛衫、襯衫、絨線衫、老棉襖算到派克大衣，老早個上海人要穿五六套衣裳來過冬。重煞了。因此羽絨服個面世就解放了大家。羽絨服撥上海人叫作滑雪衫。滑雪衫勿但輕還穿了暖熱，式樣款式也要比老棉襖花頭多。從此以后上海人過冬就瘦身了：一件內衣、一件套衫、一件滑雪衫，簡單方便多了。“老三套”棉毛衫、絨線衫、老棉襖開始退出歷史舞臺。做人家個上海人還舍勿得扔掉搿點寶貝，還拿伊曬曬太陽、壓壓箱底。我九十多歲個老姆媽就翻出一條我半歲辰光穿過個開襠小棉褲，老布面子、絨夾里，還簇新簇新個。我拿伊當古董當心收藏了。畢竟阿拉大家儕是穿仔搿樣個行頭來走上人生道路個。
